原创客家山歌《农民辛苦望丰收》作词:温彩兰、清唱:温小霞

《农民辛苦望丰收》

作词：温彩兰

清唱：温小霞

2017.11.1

十月北风响呼呼

农民辛苦望丰收

五谷杂粮爱收起

禾黄唔割苗爱枯

忙到腰酸脚发抽

忙到腰酸脚发抽

日出忙碌到暗晡

六月冇只闲阿嫂

十月冇只闲阿姑

皮肤粗糙晒到乌

皮肤粗糙晒到乌

做到腰驼背又哺

十月收冬系辛苦

怡乐都冇闲工夫

只只做到象条驴

象条驴来系好忙

十月收冬系紧张

割转禾来爱晒谷

晒干稻谷落粮仓

稻谷落仓忙杂粮

稻谷落仓忙杂粮

改转番薯放家堂

各样杂粮爱收起

秋去冬来就落霜

做到手脚发冻疮

做到手脚发冻疮

几多辛苦换成粮

乡村农活真唔少

咸菜腌好爱落缸

忙忙碌碌一月长

忙忙碌碌一月长

粮食落仓心定堂

秋收虽然系辛苦

杂粮满间谷满仓

唔使拿钱去买粮

唔使拿钱去买粮

刮风落水唔使慌

日日米缸有米倒

养鸡养鸭猪也养

还搭养兔养牛羊

还搭养兔养牛羊

农民收入系相当

耕田种地来致富

农业发展大步上

家家户户奔小康

家家户户奔小康

莫来小看耕田郎

耕田种养有发展

胜过奔波出外乡

农村生活人向往

五华硝芳涯家乡

出生兴民小村庄

姓温彩兰涯名字

少读诗书在学堂

今日冇才苦难当

今日冇才苦难当

爱请老师多原谅

讲起写作涯中意

冇才难写好文章

希望老师多帮忙